Kapulisan sa San Francisco, AgSur gimugna ang “PBBM” para sa katawhan
AGUSAN DEL SUR -- Ang San Francisco Municipal Police Station (MPS) sa lungsod sa San Francisco, niining probinsya ubos sa pagdumala ni Police Lieutenant Colonel Nathaniel P Agatep, ang officer-in-charge, gipakusgan ang usa ka proyekto nga gipangunahan sa Agusan del Sur Police Provincial Office (ADSPPO) nga gitawag ug “PBBM” nga ang bu-ot ipasabot “Panapton, Butang ug Bado Ko, Makanmo (ma-imo)”.
Kini gihimo atol sa gipahigayon nga Culmination Ceremony sa ika-27th Police Community Relations (PCR) Month dili pa lamang dugay didto sa Camp D.O. Plaza, ADSPPO, Patin-ay, Prosperidad, Agusan del Sur.
Tungod niini, gaawhag ang atong mga kapulisan nga manuktok sa inyong malumong kasing-kasing ug magahangyo sa pagsalmot sa maong paningkamot aron makatigum kita ug ubay-ubay nga mga panapton, duwa-an, senina, sapatos, tsenilas ug daghan pang uban nga mga butang para matunol kini ngadto sa katawhang nanginahanglan.
Daku kaayo ang pasalamat sa San Francisco MPS tungod Kay ubay-ubay na usab ang mitugon ug midonar para sa maong programa. Nagpasalamat usab ang ahensiya sa mga stakeholders nga aktibong miduyog niining proyekto. (San Francisco MPS/ADSPPO/PIA-Agusan del Sur)