Agusan Norte ipailawom na sa MGCQ apan gobernador may pasidaan sa publiko
DAKBAYAN SA BUUTAN, Hunyo 3 -- Ipailawom na sa Modified General Community Quarantine [MGCQ] ang probinsya sa Agusan del Norte sugod Hunyo 1, sumala pa sa Executive Order [EO] No. 28 nga gipirmahan ni Gov. Dale B. Corvera.
Ang MGCQ usa ka ang-ang sa estado sa mga restrictions nga giimposar sa gobyerno isip lakang aron mapugngan ang pagkuyanap sa gikalisangan nga COVID-19. Sumala pa sa EO nga transition kini gikan sa General Community Quarantine [GCQ], nga maoy estado sa probinsya karon, ngadto sa new normal.
Mahinumdoman nga miagi ang probinsya ubos sa GCQ niadtong Marso, unya Enhanced Community Quarantine [ECQ] sa tunga-tungang bahin sa Abril, unya balik sa GCQ nga mao ang estado hangtud ugma, Mayo 31.
Base sa mga probisyon sa EO, mahimong luag-luag na ang mga restrictions ubos sa MGCQ. Apan nagpasidaan si Gob. Corvera nga dili gyod mokompiyansa ang mga Agusanon ug hugot pang magtamud ang tagsatagsa sa minimum nga health protocols sa social distancing, kanunay’ng paghugas og kamot ug pagsul-ob og mask. (LGU Agusan del Norte/PIA Agusan del Norte)
Carmen silutan ang pagpakaylap og fake news
By JVDemain
DAKBAYAN SA BUTUAN, Hunyo 3 -- Silutan na sa lungsod sa Carmen ang mga molupyo niining magpakaylap og fake news sa unsa mang paagi sigon sa Municipal Ordinance No. 04 nga gideklara nga balido sa Sangguniang Panlalawigan subay sa balaod.
Tumong sa “Anti-Fake News Ordinance” nga gipangunahan ni Carmen SB Member Erma Estoque nga mahunong na ang pagpakaylap og sayop nga impormasyon tungod sa dili maayong epekto niini ngadto sa katilingban. Multa og pagkapriso ang ipataw niadtong mapamatud-ang nagabuhat niini lakip na usab kadtong mitabang aron mapakaylap ang malisyosong impormasyon. Doble nga silot ang ipataw matod pa kung ang nakahimo niini usa ka opisyal sa gobyerno.
Gitawag nga fake news kadtong balita o impormasyon nga dili basi sa kamatuoran o dili tinood pinaagi sa pag post sa social media (Facebook, twitter, instagram) nga mosangtop sa kasamok, kaguliyang, panagbingkil ug pagkadaot sa reputasyon sa tawo.
Pahamtangan usab og silot ang mass media o social media platform nga dili gilayon mutangtang sa maong fake news diha sa ilang website.
Ang nasangpit nga ordinansa giaprobahan pinaagi sa Sanggunian Resolution No. 233-2020 sa rekomindasyon sa SP Committee on Information and Communication nga gipangunahan ni SP Member Erwin L. Dano atol sa ilang ika-43 nga sesyon regular ug subay sa ligal nga opinyon ni Provincial Prosecutor Danny C. Serrano. (LGU Agusan del Norte/PIA Agusan del Norte)